“”ASAN xidmət”də 308 xidmət göstərilir”

“Pandemiya dövrü elektron hökumət sahəsində yeni imkanlar yaratdı. Hər bir iş rəqəmsal identifikasiyadan başlayır. Rəqəmsal savadlılıq yüksək olmalı, inkişaf etməlidir”.

SOSİUM.az xəbər verir ki, bunu Vətəndaşlara Xidmət və Sosial İnnovasiyalar üzrə Dövlət Agentliyinin “Elektron Hökumətin İnkişafı Mərkəzi” (EHİM) publik hüquqi şəxsin fəaliyyətinin 3 ilinə həsr olunan mətbuat konfransında Elektron Hökumətin İnkişafı Mərkəzinin direktoru Fariz Cəfərov deyib.

Onun sözlərinə görə, bütün dünyada vətəndaşların ən çox istifadə etdiyi elektron bankçılıq, elektron imza, elektron sosial layihələr, elektron səhiyyə, elektron təhsil, elektron məhkəmə və sairdir:

“2019-2020-ci illər bizim üçün proaktiv xidmətlərə keçid ilidir. 2020-2025-ci illər üçün isə strateji hədəf Azərbaycanda tamamilə kağızsız xidmətin göstərilməsi, süni intellektdən istifadə etməkdir. Eyni zamanda, hədəflərdən biri milli İT Xidmətlərinin xaricə ixrac edən tərəf olmasıdır”.

F. Cəfərov deyib ki, “ASAN xidmət”də bu günə qədər 308 xidmət göstərilir:

“Bu xidmətlərdən 11-i dövlət qurumlarına aiddir. Bu günə qədər 42 milyon müraciət olub və 7,3 milyon vətəndaşa xidmət göstərilib. İnsan dünyaya gələndən ölənə qədər bütün dövrlərdə müəyyən məlumatlar formalaşır. Ötən il hesablamalar apardıq, məlum oldu ki, təxminən data kataloquna 1000 adda informasiya toplanır. Əsas məqsəd dövlət qurumlarının vətəndaş haqqında məlumatları həmin mənbənin özündən götürməsidir. Artıq “ASAN login”də yaradılan yeni xidmət də ölkəmizdə yenilikdir, xidmət anlayışı tamailə dəyişir. Artıq arayışlar demək olar ki, olmayacaq və dataya çevriləcək. Çünki dövlət qurumunun informasiya sistemi digər dövlət qurumunun informasiya sistemi ilə mübadilə aparır. Bu çox ağır iş olsa da, artıq bütün işlərin fundamental əsasları var”.

Oxşar xəbərlər