“İrəvan müharibə fikrindən əl çəkməsə…”

“Birmənalı olaraq bildirirəm ki, əgər Ermənistan yenidən müharibəyə başlamaq kimi sərsəm fikrindən əl çəkməsə, başlayacaq olan müharibə nəticəsində Azərbaycan bayrağı İrəvanın mərkəzində dalğalanacaq. Hesab edirəm ki, rəsmi İrəvan bu cür başından böyük qələt etməz, indi gördüyümüz isə yalançı hay-küydür”.

SOSİUM.az xəbər verir ki, bunu Milli Məclisin deputatı Elman Məmmədov deyib.

Deputat bildirib ki, Ermənistan, həmişə olduğu kimi, bu gün də torbasını götürüb dünya dövlətlərinin, müxtəlif qurumların canına düşüb ondan-bundan pul dilənir:

“Ali Baş Komandanımız İlham Əliyevin dediyi kimi, Ermənistan ordusunun sadəcə görüntüləri və adı qalıb. 44 günlük Vətən Müharibəsi dövründə tamamilə darmadağın edilən Ermənistan ordusunu yenidən dirçəltmək, o cümlədən döyüş qabiliyyətinə qaytarmaq üçün bir neçə şərt var ki, bunlardan birincisi maliyyə vəsaitidir, iqtisadiyyatın güclü olmasıdır. Ermənistanda isə bu yoxdur. Həmişə olduğu kimi, bu gün də torbasını götürüb dünya dövlətlərinin, müxtəlif qurumların canına düşüb ondan-bundan pul dilənir. Bu yolla isə ordu saxlamaq mümkün deyil. Fikrimcə, onların bu xülyaları hay-küyçülükdən başqa bir şey deyil: siyasi hakimmiyyəti əldə edə bilmək, xalq arasında etimad qazanmaq üçün boğazdan yuxarı deyilən şüarlardır. Ağılları yerindədirsə, belə bir hərəkətə heç vaxt yol verməzlər. Çünki müharibəyə başlasalar, təkrar edirəm, bu savaş mövcud olan Ermənistan dövlətinin müharibə nəticəsində mövcudluğunu sual altında qoya bilər”.

Deputatın sözlərinə görə, Dünya Birliyi xüsusən müharibə dövründə diplomatiya sahəsi, siyasi meydan, eyni zamanda informasiya istiqamətində Ermənistanı xilas etmək üçün, belə demək mümkünsə, Azərbaycanın üzərinə hücuma keçdilər:

“Ermənistan müharibə boyunca onları dəstəkləyən təşkilatlara, həmin qüvvələrə minnətdar olmalıdır. Həmçinin, onları tamamilə məhv olmaqdan xilas etdiyi üçün Rusiyanın, rusların əlindən-ayağından öpməli, Cənab Prezidentin dediyi kimi, dabanlarını yalamalıdır”.

Oxşar xəbərlər